Acts 5

Ananias mo Sapphira

1Taane dono ingoo go Ananias, dono lodo go Sapphira, meemaa ne hui gi daha di nau gowaa donu. 2Taane deelaa ne dugu di baahi nia bahihadu e hai ana mee. Di hai deenei la gu donu ginai labelaa dono lodo, ga kae nia bahihadu ala e dubu gi digau agoago hagau. 3Peter ga heeu gi mee, “Ananias, goe e aha dela ne hai Satan gi dagi ina goe gi halahalau ina di Hagataalunga Dabu, i dau dugu di baahi au bahihadu ala ne kumi kooe mai di hui dau gowaa? 4I mua di hui dau gowaa gi daha, gei di maa nogo hai di gowaa ni aau. I muli dau hui di maa gi daha, gei nia bahihadu la nia bahihadu ni aau. Malaa goe ne aha dela ne hagamaanadu beenei? Goe hagalee ne halahalau nia daangada, gei ne halahalau hua a God!” 5Ananias ne longono hua telekai deenei, geia ga hinga gi lala, gu made. Digau huogodoo ala ne longono di kai deenei, la gu mmaadagu huoloo. 6Nia dama daane ga loomoi, ga hii tuaidina o maa, ga lahi gi daha, ga danu.

7Hoohoo nia aawaa e dolu nomuli, gei dono lodo ga ulu mai gi lodo, e de iloo di mee ne hai. 8Peter ga heeu gi mee, “Hagia mai be maa deenei go di hulu bahihadu huogodoo dela ne kumi go goolua mai di gulu gowaa?”

Di ahina deelaa ga helekai, “Uaa, aanei huogodoo.” 9Peter ga helekai gi mee, “Maeaha dela goolua mo doo lodo ne hagamaanadu bolo e hagamada di Hagataalunga o Dimaadua? Nia daane ala ne danu doo lodo, la aalaa i di ngudu di bontai dolomeenei, ga lahi goe gi daha!” 10Di madagoaa hua deelaa, di ahina deelaa ga hinga gi lala i mua o Peter, ga made. Nia dama daane ga lloomoi gi lodo, ga gidee bolo mee gu made, ga lahi a mee gi daha, ga danu i baahi dono lodo. 11Di a dabu hagatau mo nia daangada huogodoo ala ne longono di kai deenei, la gu mmaadagu huoloo.

Nia mogobuna haga goboina

12Digau agoago hagau e hai nadau mogobuna e logowaahee i baahi nia daangada huogodoo. Digau ala ne hagadonu gu buni gi di gowaa e dahi i di “Balanda Solomon” i di Hale Daumaha. 13Nia daangada huogodoo e hagaamu digau ala ne hagadonu, gei digau ala i tua e mmaadagu di hagabuni gi digaula. 14Gei deeai, e dogologo gu madalia di buini deelaa, nia daane mono ahina dogologo gu hagadonu Dimaadua. 15Idimaa nia hegau digau agoago hagau ala ne hai, digau magi gu lahi gi hongo nia ala, gu dugu gi hongo nia mee taga dangada mono gahala, bolo di malu o Peter gi tale gi digaula i dono madagoaa ma ga hanimoi laa laa. 16Digau dogologowaahee ne loomoi i nia waahale i daha o Jerusalem, e laha mai nadau gau magi, mo digau iai nia hagataalunga huaidu nadau lodo, gei digau huogodoo gu hili, gu maaloo.

Tadaaligi o digau agoago hagau

17Tagi aamua hai mee dabu, mo ono ehoo huogodoo ala e buni ang gi di buini Sadduccee, gu de hiihai huoloo gi digau agoago hagau, ga hai nadau mee gi digaula. 18Digaula ga kumi digau agoago hagau aalaa, ga kili gi lodo di hale galabudi. 19Di boo hua deelaa, tangada di langi o Dimaadua ga huge nia bontai o di hale galabudi deelaa, ga haga ulu gi daha digau agoago hagau, ga helekai gi digaula, 20“Goodou hula, tuu i lodo di Hale Daumaha, agoago dogomaalia gi nia daangada di hai o di mouli hoou.” 21Digau agoago hagau aalaa gu hagalongo, hooaga heniheni loo, ga ulu adu gi lodo di Hale Daumaha, ga daamada ga agoago.

Tagi aamua hai mee dabu mo ono ehoo ga gahi mai nia dagi digau o Jew huogodoo gi baahi digau hai gabunga aamua huogodoo. Digaula ga haga iloo gi di hale galabudi bolo gi laha mai digau agoago hagau gi nadau mua. 22Di madagoaa digau dauwa ne dau i di hale galabudi, gei digau agoago hagau la gu hagalee i lodo di hale galabudi deelaa. Digaula ga huli gi muli, ga hula gi baahi digau aamua hai gabunga, ga helekai gi digaula, 23“Di madau dau adu hua gi di hale galabudi, gimaadou gu gidee bolo nia bontai huogodoo le e tai, gei digau hagaloohi e hagaloohi hua i nia ngudu nia bontai aalaa. Di madau huge adu nia bontai aalaa, ga gidee bolo ma tangada i lodo ai!” 24Di madagoaa tagi digau hagaloohi di Hale Daumaha mo digau aamua hai mee dabu ne longono nnelekai aanei, digaula gu gologolo huoloo gi nia mee ala ne hai ang gi digau agoago hagau aalaa. 25Malaa, di madagoaa deelaa, tangada ga ulu adu gi lodo, ga helekai ang gi digaula, “Goodou hagalongo! Nia daane ala ne kili go goodou gi lodo di hale galabudi, le e hai nadau agoago gi nia daangada i lodo di Hale Daumaha!” 26Malaa, di tagi o digau hagaloohi ga hana mo ana hege belee laha mai digau agoago hagau aalaa. Digaula e laha mai digau agoago hagau hagahumalia, idimaa, digaula e mmaadagu bolo nia daangada la ga dilidili ginaadou.

27Digaula ga laha mai digau agoago hagau gi lodo, ga haga tuu digaula i mua digau hai gabunga aamua, ga daamada ga hagi aga digaula, ga helekai, 28“Gimaadou gu gowadu madau haganoho maaloo dangihi bolo goodou hudee agoago labelaa i di ingoo o taane deenei, mmada gi godou mee ala ne hai! Goodou gu hagadele godou agoago laa lodo Jerusalem hagatau, ge e hagaanga mai labelaa gi gimaadou di made o taane deenei!” ^a 29Gei Peter mono gau agoago hagau ala i golo ga helekai, “Gimaadou e hai gi hagalongo gi God, hagalee hagalongo gi nia daangada. 30Di God o tadau maadua mmaadua ne haga mouli aga a Jesus mai i di made i muli dono daaligi go goodou, ga dogi gi di loobuu. 31God gu haga menege aga a mee gi dono baahi gau donu, belee hai di Tagi mo Tangada Hagamouli, belee wanga gi digau Israel di madagoaa humalia e lui ai nadau manawa, e huli hoou ge e kae di maahede o nadau huaidu. 32Gimaadou la go digau haga modongoohia o nia mee aanei. Gimaadou mo di Hagataalunga Dabu a God dela ne wanga gi digau ala e hagalongo ang gi deia.” 33Di madagoaa digau aamua hai gabunga ne longono nia mee aanei, ginaadou gu hagawelewele huoloo, gu hiihai bolo digau agoago hagau aalaa le e daaligi gi mmade. 34Tangada e dahi i digaula la di Pharisee, dono ingoo go Gamaliel, tangada hagadondonu haganoho ge e hagalabagau labelaa i baahi nia daangada huogodoo, ga duu i-nua i di gowaa hai gabunga aamua deelaa, ga hagadaba bolo digau agoago hagau aalaa gi lahia gi malaelae. 35Gei mee ga helekai gi digau aamua hai gabunga aalaa, “Nia daane o Israel! Goodou pula i goodou i godou mee ala ga hai gi nia daane aanei. 36Di madagoaa dulii gu doo gi daha, taane go Theudas ne hanimoi labelaa, e hai bolo ia tangada aamua. Holongo nia daangada e haa lau nogo ginaadou. Taane deenei la gu daaligi, gu made, gei digau ala nogo daudali a mee la gu lellele dagidahi, gei nia mee ala nogo hai go mee, la gu hagalee. 37Ga nomuli, Judas, tangada Galilee ga hanimoi labelaa i di madagoaa dela e hihi nia madahaanau, gei nia daangada gu daudali a mee, gei mee gu daaligi labelaa, gu made, gei digau nogo daudali a mee gu lellele dagidahi labelaa. 38Dolomeenei, au e aago adu gi goodou bolo goodou hudee hai dahi mee e hai baahi ang gi nia daane aanei. Maa nei bolo nadau hagamamaanadu mo nadau hegau la ne daamada mai baahi nia daangada, gei nia maa la gu hagalee. 39Gei nia maa ne hai mai baahi o God, goodou e deemee di aali i nia maa. Goodou pula i goodou. Hudee hai dahi mee belee hai baahi ang gi di manawa o God!”

Gei digau aamua hai gabunga aalaa gu daudali di aago a Gamaliel. 40Digaula ga gahigahi mai digau agoago hagau gi lodo, ga haga mamaawa digaula, ga hagamodu gi digaula bolo gi hudee agoago labelaa i di ingoo o Jesus, ga haga maahede digaula. 41Digau agoago hagau aalaa ga hagatanga gi daha mo digau hai gabunga aamua aalaa. Digaula gu tentene huoloo di hai a God dono hila ang gi ginaadou, e hiihai labelaa bolo ginaadou e tau hua gi nadau hagaduadua haga langaadia i di gili di ingoo o Jesus. 42Nia laangi huogodoo i lodo di Hale Daumaha, mo lodo nia hale o nia daangada, digaula gi mua hua i lodo nadau hai agoago mo di haga modomodongoohia di Longo Humalia o Jesus, bolo mee go di Mesaia.